ᐋ ᑎᐹᑐᑖᒡ
ᐊᓐ ᒉᐃᒥᔅ ᐯᐃ ᑭᔮᐦ ᒌᐙᑎᓐ ᑯᐯᒃ ᓂᔅᑯᒧᐎᓂᐦᒡ (1975) ᐐᔥᑖᐤ ᑖᓐ ᒑ ᐃᔑ ᓈᓈᑭᒋᐦᑖᑭᓂᐎᒡ ᐊᔅᒌ ᑭᔮᐦ ᐱᒫᑎᓰᐎᓐ ᐊᓂᑖᐦ ᒉᐃᒥᔅ ᐯᐃ ᐊᔅᒌᐦᒡ (ᐄᔨᔨᐤ ᐊᔅᒌ)᙮ ᐋᔪᐎᒄ ᐅᑖᐱᑎᓰᐎᓂᐙᐤ JBACE ᒑ ᓈᓈᑭᒋᐦᑖᒡ ᐅᔮ ᐋ ᐃᔑ ᐱᒥᐱᔨᐦᑖᑭᓂᐎᔨᒡ ᑳ ᐃᔑ ᐐᔥᑖᔨᒡ᙮ ᐋᔪᐎᒄ ᑭᔮᐦ ᐋ ᐙᐙᐱᐦᑎᐦᒡ ᐐᔓᐙᐎᓐᐦ ᑭᔮᐦ ᒋᔅᒋᓂᐙᐱᐦᑏᐙᐎᓐᐦ ᐋᒄ ᒫᒃ ᒑ ᒑᔥᑎᓈᑖᔮᔨᐦᑖᑯᐦᒡ ᐋᑳ ᒑ ᑖᐦᑭᐦᐄᒑᐱᔨᔨᒡ ᐅᑭᔅᒋᐦᐅᐎᓂᐙᐦᒡ ᐄᔨᔨᐅᒡ, ᑭᔮᐦ ᒑ ᓂᑑᒋᔅᒑᔨᐦᑖᑭᓂᐎᒡ ᐋ ᐃᔑ ᑖᐦᑭᐦᐄᒑᐱᔨᒡ ᒑᒀᓐ ᐊᔅᒌᐦᒡ ᑭᔮᐦ ᐱᒫᑎᓰᐎᓂᐦᒡ ᑭᔮᐦ ᒑ ᐙᐙᐱᐦᑖᑭᓂᐎᒡ ᐊᓐ ᐋ ᐊᑎ ᐃᐦᑎᓈᓂᐎᒡ ᐋᒄ ᒫᒃ ᓂᒥ ᓈᔥᒡ ᐋᐦᒀᒡ ᒋᑭ ᐃᔑ ᑖᐦᑭᐦᐄᒑᐱᔨᐤ ᐊᓐ ᒑᒀᓐ ᐋ ᐐᐦ ᒋᐦᒋᐱᔨᐦᑖᑭᓂᐎᒡ᙮
ᒫᒀᒡ ᐋᐱᑎᔒᔥᑎᒧᒡ JBACE ᐋ ᐅᔅᒋᐦᑖᒡ ᐊᓐ ᐋ ᓂᑑᒋᔅᒑᔨᐦᑖᑭᓂᐎᒡ ᐋ ᐃᔑ ᑖᐦᑭᐦᐄᒑᐱᔨᒡ ᒑᒀᓐ ᑭᔮᐦ ᐊᓐ ᐋ ᐙᐙᐱᐦᑖᑭᓂᐎᒡ ᐋ ᐊᑎ ᐃᐦᑎᓈᓂᐎᒡ ᐅᐦᒋ ᐊᓐ ᐋ ᒋᔅᒋᓰᐦᑖᑭᓂᐎᒡ ᐃᔨᐦᒡ ᐋ ᐊᑎ ᐃᔑᓈᑯᐦᒡ ᒑᒀᓐ ᐱᒫᑎᓰᐎᓂᐦᒡ ᑭᔮᐦ ᐋ ᐊᑎ ᐅᔥᑳᒡ ᐊᓐ ᒑᒀᓐ ᐋ ᐊᑎ ᐃᔮᐱᒋᐦᑖᑭᓂᐎᒡ ᑭᔮᐦ ᒑ ᒌ ᐅᐦᒋ ᐙᐐᒋᐦᐄᐙᒡ ᒥᓯᐙ ᐊᐙᓂᒌ᙮ ᐋᐅᒄ ᑭᔮᐦ ᑳ ᐱᒋᔅᑎᓂᑭᓂᐎᒡ ᐋ ᓂᑐᐙᔨᐦᑖᑭᓂᐎᒡ ᒑ ᒌ ᒥᒋᓈᐱᐦᑖᑭᓂᐎᒡ ᐋ ᒋᔥᑎᒫᐅᐦᒡ ᒑᒀᓐ ᐋ ᐃᔑ ᑖᐦᑭᐦᐄᒑᐱᔨᒡ ᐊᔅᒌᐦᒡ ᑭᔮᐦ ᐱᒫᑎᓰᐎᓂᐦᒡ ᐅᐦᒋ ᐊᓐ ᐋ ᐅᔑᐦᑖᑭᓂᐎᒡ ᒑᒀᓐ ᐊᓂᑖᐦ ᐊᑎᒫᐲᓯᒽ᙮